政情：AV仁「獵艷」累死騸雞
民主黨呢隻白鴿點解好似染咗禽流感咁，愈飛愈無力？該黨核心兼立法會議員單仲偕（騸雞），點解會喺剛結束嘅南區區議會海怡西補選慘敗？綜合各方分析，今次白鴿墮地主要有七大死因，部分涉及外圍因素，但其中一個主死因——「AV仁」何俊仁被本報直擊佢喺開會期間狂睇美女艷照醜聞，就點都冇得賴人。有白鴿黨中人直言，今次補選已為該黨敲響咗隨時亡黨嘅警鐘！
新民黨新星陳家珮今次高票勝出海怡西補選，喺政界其實唔算十分意外，因為陳家珮本身形象好及夠勤力，並有新民黨主席葉劉淑儀等黨友力撐。加上該區議席本來係屬於時任白鴿黨中委嘅馮煒光，馮中途「走佬」辭職加入政府，選民遷怒於佢嘅前黨友騸雞都好正常。
得票仲少過「空降」袁彌明
選舉結果最令人震驚嘅係，喺政壇打滾接近三十年嘅騸雞，得票竟然仲少過同樣「空降」該區嘅人民力量主席袁彌明（Erica），令人質疑係咪連海怡半島呢個中產老社區嘅選民，都變到好似時下啲八、九十後咁激進。
有白鴿黨中人分析，騸雞今次慘敗主要有七大死因，除咗上述嘅新民黨光環、馮煒光效應同選民激進化外，仲有公民黨工黨拒絕幫拖、鄭家富倒戈、騸雞唔夠Erica勤力、以及「AV仁」醜聞等因素。
其實騸雞同Erica今次嘅得票總和，同一一年馮煒光加另外兩位激進泛民候選人相若，分別係當年公民黨同工黨與白鴿黨企喺同一陣線，今次補選兩黨就完全唔見影，其中公民黨與「民主阿婆」前政務司司長陳方安生，仲揀正喺投票當日大搞政改論壇，擺明無意助選，令唔少該兩黨嘅支持者轉投咗Erica。至於一直唔妥騸雞嘅前白鴿黨立法會議員鄭家富，原來本身係海怡居民，佢喺今次補選疑似「大報復」力撐Erica，亦搶走咗騸雞唔少票源。
另有海怡西選民透露，Erica喺今次選舉使出三大奇招冧選民，包括每晚守喺巴士站向夜歸一族送上招牌笑容，另加親切問候：「我係唯一一位接你放工嘅候選人袁彌明」，仲有專同啲家庭主婦選民分享美容心得，以及數臭騸雞落區少兼立會出席率低等。但實情係騸雞成日困咗喺立法會開會，先至分唔到身日日落區啫。
港島區「票倉」恐畀人食埋
經過今次「試票」，政界估計Erica會喺一六年立會選舉轉戰香港島直選。經歷慘敗嘅騸雞則極可能會棄選退休，或者改為排喺名單第二位幫黨內乳鴿「抬轎」。到時佢個位會否畀人力或公民黨食埋，令該黨從此絕迹佢哋嘅傳統「票倉」港島區，真係冇人講得準。