中環出更：梁福元個頭 媲美「掃把頭」
十八鄉鄉事委員會主席梁福元個髮型，出晒名夠高夠硬又夠濃密，令唔少有脫髮危機嘅男士或女士羨慕不已，新民黨主席葉劉淑儀同佢黨友元朗區區議員黃卓健（Legward）都有留意到，葉太仲大讚梁福元個頭，同佢○三年做保安局局長時嗰個「掃把頭」一樣咁有標誌性！
話說Legward周末同身兼元朗區議員嘅梁福元去咗行山，之後喺社交網站上載咗張合照，自言要特登企高啲，先至可以追平「福元哥＋佢個髮型」咁高。佢又形容梁福元除咗圍村知識豐富外，連頭髮亦好多，令唔少男士羨慕，例如早十幾年已經差唔多甩晒啲頭髮嘅政制及內地事務局局長譚志源，早前出席元朗區議會推銷政改諮詢時，亦公開讚過梁福元個頭夠晒濃密。
「一樣咁有標誌性」
葉太見Legward講政界人士髮型講得咁開心，都忍唔住留言，話梁個髮型同自己當年嗰個髮型一樣咁有標誌性。記得葉太當年畀反對《公安條例》同廿三條立法嘅人，笑佢個頭做「掃把頭」，有同事曾建議佢改變髮型以免招人話柄，但葉太就豪言：「如果我連自己個髮型都捍衞唔到，又點捍衞香港治安！」成為一時佳話。
卓妮