中環出更：廠商會80歲青委送厚禮
潮流興微電影，今年八十歲生日嘅中華廠商聯合會，都拍咗部片做賀禮。朝氣勃勃嘅廠商會青年委員會委員，早前絞盡腦汁幫手度劇本，並以六位數字片酬，請來跨媒體創作人彭秀慧，製作全長四分幾鐘微電影，真係秒秒鐘有血有汗。廿幾位青委又搵星級舞蹈老師，同佢哋進行魔鬼式訓練，為下月十七日廠商會八十周年會慶晚宴上粉墨登台做好準備。
表演在即，青委主席張永鴻（Philip）尋日相約六位副主席與廠商會副會長吳永嘉，齊齊喺馬會會所一邊食晏，一邊「腦震盪」，諗吓點樣可以令套微電影同佢哋嘅舞步盡善盡美。套微電影拍咗兩星期，日前剛大功告成。雖然冇青委親自出鏡，但劇本都係圍繞「廠二代」嘅心聲，稍後喺巴士上播放。
拍微電影 跳舞助興
除咗拍微電影，成班青委仲準備喺四月中嘅會慶晚宴上作壓軸舞蹈表演。Philip賣關子話，佢哋隻舞嘅難度，遠勝一度熱爆全城嘅騎馬舞。
為咗準備登台，眾人秘方盡出，除咗每星期勤練兩晚舞，三名女副主席王詩雅每朝食乳酪keep fit、劉子芸就食靈芝粉美肌、顏明秀更話跳咗五堂後，贅肉立即拜拜，認真神奇。另一副主席黃浩鈞本來想跳埋一份，可惜去年尾參加商會足球比賽時不慎扭傷膝蓋，到依家仲休養緊，今次惟有做住啦啦隊先嘞。
卓妮