啟德郵輪碼頭究竟有幾甩漏，大家都見識過喇，天花漏水，交通配套不足，商店應有盡冇，咁失禮嘅旅遊設施睇怕行勻全世界都搵唔到。其實，除咗呢啲甩漏之外，郵輪碼頭仲有好多烏龍嘢。
話說郵輪碼頭上年中啟用之後，三樓天台花園亦成為本地旅行社「一日遊」嘅新景點，唔少人都想參觀呢個空中花園，感受三百六十度飽覽維港景色嘅樂趣。點知呢個耗資八十億元興建嘅郵輪碼頭，居然連旅巴上落客泊車位都唔夠，問你服未！
本報發現，喺郵輪泊岸日子，碼頭方面會向「一日遊」旅巴徵收二百五十蚊上落客費。你知啦，本地團收費平，成本低，碼頭營辦商過河濕腳，獅子開大口，咁即係逼旅巴犯規，周街上落客嘅啫。嗱，本報記者到過碼頭視察，發現碼頭對出馬路車水馬龍，水洩不通，短短半小時已經有近百架旅巴接載數千名團友上落，搞到遊客好似走難咁，有人狼狽避車，有人橫過馬路，亦有旅巴無法靠泊接客，場面混亂，險象環生。大家話嘞，呢種旅遊體驗係咪夠晒驚險，夠晒難忘吖？
郵輪泊岸就話要收費啫，點解旅巴上落客都要收費呢？碼頭營辦商話喎，需要預留泊位畀接載郵輪乘客嘅旅巴，仲話未來會繼續透過收費等措施減少市民喺泊船日到碼頭參觀，避免遊客及市民逼埋一齊，造成安全問題咁話。
簡直九唔搭八！唔通市民被迫喺馬路左穿右插就冇安全問題咩？參加本地遊好多都係老人家，萬一出咗意外，邊個承擔得起吖？其實，如果當局擔心碼頭旅巴泊位不足，最理想嘅做法係增加泊位，而唔係將旅巴拒諸門外，對遊客安全問題視而不見！
講開又講，郵輪碼頭配套設施甩皮甩骨，大家都見怪不怪咯。先唔講開幕當日的士站空空如也，要遊客大排長龍等車嘅經典場面，單係市內接駁交通嚴重缺乏，已經抵鬧喇。當局一時話要將郵輪碼頭打造成新地標，一時又話要將東九龍發展成消閒旅遊區，但係接駁碼頭嘅公共交通只得一條專線小巴線及一條假日巴士線咁大把，講出嚟都笑大人個口喇。計功夫茶話齋，碼頭營辦商口口聲聲為遊客着想，實際係罔顧遊客利益就真。
咁講啦，郵輪碼頭甩甩漏漏，已經趕客嘞，如果連市民參觀空中花園都怨聲載道，形象肯定進一步插水，到時你哋唔使擔心泊位不足，一個千瘡百孔嘅旅遊設施遲早拍烏蠅嘅咋！