政情：肥彭又同港英餘孽密斟
末代港督彭定康以英國牛津大學校監身份訪港五日，原本講明不談政改唔會搞搞震，但實際上就不斷會見在港嘅港英餘孽密密斟。肥彭繼早前被本報踢爆，接連與「民主阿婆」前政務司司長陳方安生同鄧永鏘爵士密會撐枱腳後，尋日佢去牛津大學香港畢業生會活動時，又同前布政司鍾逸傑爵士密斟，事後鍾爵士話同肥彭傾得好開心。肥彭咁鍾意同爵士會面，唔知佢臨走前會否見埋「貪曾」前特首曾蔭權爵士呢？
話冇同「民主阿婆」講政改
陳太前日喺電台節目中，「此地無銀三百兩」咁話無同肥彭傾過政改問題。肥彭尋日亦夾晒口供咁話，真係冇同陳太傾過政改，亦無討論「佔領中環」行動，又聲稱對陳太提出嘅普選特首方案冇意見喎，真係搵鬼信。肥彭淨係肯承認，同陳太講過會喺今年十月舉行嘅牛津大學展覽中，展出陳太先母、國畫大師方召麐嘅畫作。
問肥彭點解要同陳太等人食飯會面，佢強調自己喺香港仲有好多好朋友，陳太更加係佢其中一位最要好嘅朋友，講得認真癡纏。