政情：「印」證議員環保得把口
立法會秘書處為咗推行環保、減少用紙，已經實行咗「無紙化」好一段時間，但原來至今仍有唔少立法會議員，要求秘書處將啲會議文件逐份影印畀佢哋，部分議員連自己無加入嘅委員會，都要求印晒中、英文版嘅文件。班議員成日將「環保」掛喺口邊，實際行為就係不折不扣嘅大嘥鬼，講一套、做一套，真係唔要得。
葛珮帆話遷就同事
秘書處近日再次發信畀議員，再三提醒佢哋立法會早已將所有會議文件以電子方式發放，議員透過開電郵或直接上網就可以睇晒，如非必要就唔好印出嚟。秘書處仲附上現時全體七十位議員，每一位要求索取中、英文版文件影印本嘅情況，如議員想減少伐木緩和溫室效應，今後想印少幾份文件，請喺今個月內通知佢哋。
根據該份紀錄，原來今時今日仲有唔少議員，要求同時索取大量會議文件嘅中、英文影印本，其中包括公民黨嘅梁家傑（袋巾傑）同郭榮鏗、民建聯嘅葛珮帆（EQ）同何俊賢（高佬賢）、工程界嘅盧偉國、以及自由黨嘅鍾國斌（Felix）等，而淨係要求索取中文版影印本嘅議員更加多不勝數。
我哋問番議員點解要索取咁多文件影印本，EQ就大呻冤枉，話自己係個IT人，早已習慣睇電子版文件，不過佢有啲同事就唔係好慣，一時同佢講英文版文件先有圖表，一時又話上網睇文件好麻煩，搞到佢都冇晒符。早前大力反對擴建將軍澳堆填區嘅EQ，又強調自己一直都好環保︰「我出街帶水樽，同事就派樽裝水！我已經好努力改變佢哋嘅行為！」
「鍾」「梁」依賴影印本
EQ要同同事進行思想教育，但Felix就自認冇影印本唔得。Felix同我哋講，因為工作太忙，又唔係坐定定喺辦公室，搞到成日都唔記得檢查電郵，所以影印本一份份咁喺枱面先最穩陣，包保唔會睇漏。佢仲話，早前秘書處通知議員六月份可以去英國參加研習，就係因為冇影印出嚟畀佢，搞到自己睇漏咗錯過截止期限。
袋巾傑就解釋，使用影印本係貪方便喺文件上做標記同傳閱，有啲文件雖然唔係自己所屬委員會嘅，但亦值得關注，所以都攞嚟睇下。經本報查詢後，佢已經吩咐同事，以後唔係佢所屬委員會嘅文件只索取電子版。