中環出更：周一嶽「危駕」不遜林健鋒
尋日周末活動多，因危險駕駛入罪嘅行政會議成員林健鋒（危駕鋒）及不小心駕駛嘅發展局局長陳茂波（酒駕波），咁啱出席同一場合做嘉賓，兩人放禮炮時仲擰嚟擰去拉唔着，十足難兄難弟。另一邊廂，人稱「周一鑊」嘅平等機會委員會主席周一嶽出席活動時，笨手笨腳試踩殘障人士手動單車，危險駕駛程度唔輸危駕鋒。
話說香港復康聯盟尋日舉辦「共融單車同樂日」，畀殘疾及健全人士一齊踩單車擴闊社交，周一鑊到場做騷，點知葫蘆身形嘅佢笨手笨腳，要幾個人圍住扶佢坐上手動三輪單車，然後繞住城門河踩約兩公里。周一鑊一開波就喘晒氣，大會主席惟有派義工跟實佢，上落斜都要幫手。去到中段，周一鑊開心到忘晒形，以為自己已適應，好得戚話：「依家好似易郁咗，比開始嗰陣鬆咗」，但回頭望先發現其實係義工一路好似推輪椅咁推住佢，認真醜怪。
賴架單車唔夠潤滑油
事後周一鑊死撐話，自己有游開水同打壁球，只係唔慣用前臂出力，又嫌架手動單車唔夠潤滑油，亦唔及新型號嘅同款單車，總之賴得就賴。
至於危駕鋒及酒駕波係出席立法會議員梁美芬新辦事處嘅開幕禮，兩人一到場就各自企埋一邊，簽名時都特登分開簽，表現尷尷尬尬。危駕鋒話，臨時收到梁美芬短訊叫佢出席開幕禮，都唔知酒駕波都會出席。言下之意，唔通係怪罪梁美芬﹖
最搞笑係，佢哋兩個唔只駕駛技術差，就連放禮炮嘅技術都一樣麻麻。話說開幕禮大家放禮炮時，惟獨佢哋兩個嘅禮炮放唔到，個個都放完禮炮，佢哋就仲喺度擰嚟擰去。唔話佢哋係難兄難弟都唔得喇！
卓妮