立法會成日畀人批評不務正業，浪費公帑，真係一啲都冇鬧錯o架。呢，早前有個電台節目主持人被炒魷，本來屬於私人機構嘅勞資糾紛，同公眾利益大纜都扯唔埋，但嗰班議員唔知係咪得閒過頭，有人居然提議引用特權法徹查事件，仲要一連討論兩日，最後得個吉，足足傾咗七粒鐘至被否決，既浪費時間，又浪費公帑，你話係咪無聊吖？
即係咁，立法會畀人稱為「垃圾會」，議事質素如何，大家早就心中有數，但估唔到愈來愈離譜，連芝麻綠豆小事都上綱上線，無事生非，唔通真係唔搞事唔安樂咩？先唔講呢位被炒魷嘅節目主持人係咪有人口中嘅「小爬蟲」，亦唔講佢主持嘅節目係咪「最垃圾」，佢嘅去留純屬個人私事，點都唔值得立法會動用被視為尚方寶劍嘅特權法去調查啩？講得直啲，用特權法查一個節目主持人被炒魷，等於用尚方寶劍切叉燒，講出嚟都笑死人喇！
所以話，今時今日嘅香港真係無奇不有。電台炒人又好，報館高層遇襲又好，仲未搞清楚來龍去脈，就被人上綱上線扯到打壓新聞自由，簡直九唔搭八。反而正義傳媒長期受到港府部門針對及打壓，呢班政客就詐睇唔到，扮晒鵪鶉。其實都難怪嘅，立法會烏煙瘴氣，黑白顛倒，有人開會搵周公，有人開會玩失蹤，有人做騷掟嘢，有人掛住睇艷照，有幾多個真心服務市民。最無辜嘅係納稅人，唔係供養無能官員，就係供養無良議員，講起真係冤枉。
都係古人講得啱，其身不正，何以正人。立法會不務正業，應做唔做，根本冇資格監督政府，唔怪得部分議員嘅民望愈跌愈殘，仲低過政府官員。計功夫茶話齋，家陣香港經濟低迷、民生凋敝、深層次矛盾愈演愈烈，如果議員真係咁得閒，不如討論吓點樣搞好經濟及民生仲好喇，市民選你哋出嚟係監督政府，為民喉舌，唔係抽水做騷，成日搞搞震吖！
見微知著，立法會嘅亂象，其實就係成個社會嘅縮影。回歸以來，香港愈來愈政治化，社會充滿戾氣，有人唯恐天下不亂，成日興風作浪，搞到七國咁亂。近年香港競爭力不斷下跌，邊緣化危機逐漸逼近，政府無能固然係主要原因，而政客不務正業同樣難辭其咎。呢，連北大人都睇唔過眼，叫香港人要把握機遇，唔好嘈嘈吵吵。可惜吖，有啲政客志在搗亂，叫佢哋唔好嘈嘈吵吵，等於與虎謀皮嘅咋。正所謂，國之將亡，必有妖孽，香港氣數已盡，睇怕神仙都難救咯！