港府成功爭取全體立法會議員到上海交流，但一眾泛民主派議員就扭扭擰擰，圍埋密密斟不特止，仲要開出一個又一個條件，實行吊高嚟賣，而民主黨（白鴿黨）更加搞到失晒方向。據悉，該黨因為經過一○年入中聯辦商討政改一役後，已變成驚弓之鳥，今次踏足內地更加小心翼翼，連派邊個上陣都要睇其他黨點做先再決定，正一白鴿變鵪鶉，認真羞家。
泛民就上海之行屢開條件，一時話行程要包括討論政改、一時又話要負責政改嘅京官單獨見佢哋，但有關方面都盡量滿足佢哋要求。講到咁，泛民黨派都冇咩藉口話唔去，但白鴿黨就依然騰騰震唔知點算好，佢哋前晚仲開中委會討論上海之行。不過，黨主席劉慧卿會後就落咗封嘴令，話內容不得外洩。原來一眾白鴿因為入過中聯辦被狙擊後已變成驚弓之鳥，今次去上海，佢哋都左度右度，就連派重量級老鴿去都擔心被人話佢哋咁隆重其事唔知博咩喎。
有鑑於此，白鴿黨竟然要睇吓公民黨（公文袋）派咩級數嘅人去，佢哋就派咩級數嘅人去。由於卿姐已表明唔出席，所以如果公文袋係派黨魁梁家傑或湯家驊去， 佢哋就由何俊仁同涂謹申上陣，如果對方只係派啲二打六，佢哋就由得議會新丁胡志偉、黃碧雲去應付就算數。