政情：外訪立志糾奢風
「貪曾」前特首曾蔭權爵士在任時「貪盡海陸空、歎盡省港澳」，除咗坐富豪遊艇、私人飛機外遊外，更借外訪之名遊埠歎世界，攞正牌多次用公帑入住總統套房，簡直窮奢極「恥」，天理不容，可惜廉政公署調查至今仍未將佢「落鑊」。曾經喺貪曾在任時做過兩年特首辦主任嘅現任政制及內地事務局譚志源（Raymond），本來都有不可推卸嘅責任，但唔知佢係咪「覺今是而昨非」，據聞佢同幾個政策局都開始「從『慳』字出發」。
回想貪曾○七年連任五年期間，去咗五十四次外訪，夾埋有一百九十六日唔喺香港，即係足足半年有多。呢啲外訪個人花費要二百二十一萬元，但係佢自己浪費納稅人公帑不特止，仲要帶埋唔少隨行人員，筆數總共花咗一千○六十七萬元，都真係幾襟計，納稅人啲血汗錢就係咁冤枉倒咗落鹹水海。唔單止咁，自從貪曾執包袱「落荒而逃」之後，外界就將矛頭指向其他政府部門，貪曾認真係陀衰家。
早機去晚機返 免瞓酒店
其中Raymond主理嘅政制及內地事務局，經常都要外訪，但就以返內地為主。我哋聽聞，Raymond早就開始決定盡量縮短外訪行程，好似返內地出席研討會，如果研討會係早上開始，黃昏結束，佢就寧願「早機去、晚機返」，瞓少一晚酒店，一來計少一日外訪行程，二來「反正都係瞓覺，倒不如瞓自己張床仲好啦！」呢個不失為慳錢嘅好方法，比起貪曾在任時外訪使公帑唔使本嘅做法，真係改善咗好多。
另外，Raymond又會善用政府駐外辦事處人員，好似政制及內地事務局之下就喺北京、上海、成都、廣東及台灣都有經貿辦事處，如果佢去呢啲地方，咁就連隨行人員都可以唔使帶，開支自然慳番唔少。記得貪曾在任時外訪，有一大班隨從跟尾幫佢拎行李，十足大爺咁款，點知風光過後變成過街老鼠。據聞除咗Raymond雷厲風行要政制局慳家外，仲有其他政策局都有樣學樣，痛改前非。