中環出更：肥彭密會爵士 幾時到貪曾？
聲稱為出席牛津大學活動而訪港嘅末代港督彭定康（肥彭），繼前晚同「民主阿婆」前政務司司長陳方安生食飯密會後，尋日中午一點左右，再約「上海灘」創辦人鄧永鏘爵士敍會，夜晚出席完牛津大學活動後，仲去咗中環一間酒店食飯添，睇嚟肥彭似乎想逐一約會身在香港嘅爵士朋友傾密偈喎，唔知下一個會唔會輪到已淪為過街老鼠嘅「貪曾」前特首曾蔭權爵士呢？
話說肥彭前晚同民主阿婆喺灣仔食晚餐後，尋日好晏至出動，相反肥彭太太一早約咗位女性外籍朋友喺酒店大堂傾偈，究竟肥彭係因為前一晚同民主阿婆傾得太多政事，搞到個人太攰要瞓晏啲吖？定係同太太夾計施展調虎離山之計呢？
肥彭結果約喺正午時間現身酒店大堂，先前往上環中遠大廈牛津大學香港辦事處開會，逗留約廿分鐘後，再去到中環置地廣場一間餐廳。佢又去餐廳，莫非又約咗港英餘孽？原來係同鄧永鏘爵士食午飯，佢哋密斟咗差唔多兩個鐘，就一齊去會合肥彭太太喇。期間，有兩、三名女士認得肥彭，仲要求合照添，唔知肥彭會唔會又好似前日見到港英旗咁興奮呢？
攪局接受電台專訪
直到晚上約六點鐘，牛津大學喺中環碼頭搞舊生會聚會，期間有十幾名手持港英旗嘅人士到場聲援肥彭，可惜肥彭早到咗兩個鐘，而呢十幾個人就披住支旗食東北風。肥彭約八點半鐘準備離開時，呢班持港英旗嘅人士即時上前要求合照，又向肥彭遞信，叫佢面對（face up）番香港嘅問題喎。雖然當時已經近九點鐘，但肥彭仍然未返酒店，反而同太太及一位外藉男士去中環一間酒店，唔知又同邊個密會呢？
其實尋日除咗肥彭有活動，民主阿婆早上都出席咗個電台節目，聲稱前晚飯局冇同肥彭講到政改喎。民主阿婆前日下午提出政改新方案，夜晚就同肥彭食飯，真係冇同肥彭匯報過政改問題？好難令人相信囉！
另外內地官媒《環球時報》尋日有篇社論，批評前日手持港英旗夾道歡迎肥彭嘅港人，係有奴才心理，又話香港殖民地年代其實冇民主，只係英國嘅提款機，所以港人若緬懷殖民統治，無疑係走歪路。據《環球時報》嘅講法，唔知民主阿婆約肥彭食飯又係咩心理呢？而且仲要匯報香港嘅最新情況，豈不是奴才中嘅奴才？
喺肥彭密會友人期間，港台英文電視節目又播出佢嘅專訪。講明今次訪港唔會提政改嘅肥彭，喺訪問中話如果可以返番轉頭，佢會希望喺臨撤出香港時推動多啲政制改革，增加政府嘅問責性。
卓妮