日薄西山，苦無出路，香港家陣嘅處境根本就係坐困愁城，坐以待斃。大家睇吓，人人熱衷於政治爭拗，人人醉心於文革批鬥，根本無人關心經濟同民生，搞到發展停滯，民生凋敝，死氣沉沉，再咁落去，香港想唔玩完都幾難咯。
有冇辦法打破困局呢？辦法唔係冇，問題在於唔知港府有冇魄力同眼光啫。嗱，有權威分析認為，大嶼山極有潛力發展成一副嶄新嘅經濟大引擎，而可行做法就係借鏡新加坡嘅經驗，加入綜合度假村元素，將呢塊處女寶地打造成集主題公園、生態旅遊、度假酒店、賭博娛樂於一身嘅旅遊新天堂。
正所謂，靠山食山，靠水食水，大嶼山化身聚財吸水嘅吃喝玩樂新天堂，絕對有得諗。一來，呢片處女寶地幅員廣闊，風景秀麗，發展旅遊可謂地盡其用，度身訂造；二來咯喎，港珠澳大橋兩年後落成通車，港府打算喺大嶼山發展橋頭經濟、建設東大嶼都會，若然加上一個美輪美奐嘅大型綜合度假村，咁就相輔相成，相得益彰喇。即係咁，北大人咪叫香港把握機遇，唔好再嘈嘈吵吵嘅，若然港府從善如流，埋首發展經濟民生，全力打造旅遊天堂，北大人無理由唔鼎力支持啫，吓話？
當然，社會係多元嘅，發展博彩業難免引起爭議，呢點可以理解。之不過咁，凡事無絕對，大家不妨睇吓新加坡吖，短短三年間，當地旅遊博彩業已經搞得有聲有色，仲躋身全球博彩業市場第三位添，而最難得嘅係，當地治安問題並無因此而轉壞，社會風氣亦無因此而轉差喎，咁就足以證明開賭唔係洪水猛獸，完全視乎你點管理嘅啫。
其實今時今日，發展旅遊博彩業已經成為全球大趨勢，俄羅斯、馬來西亞、緬甸、越南、北韓、澳洲等地都爭先恐後建賭場吸客，家陣連台灣都話想分一杯羹添，如果香港繼續固步自封，裹足不前，遲早被邊緣化嘅咋。嗱，就講新加坡吖，一○年兩個綜合度假村落成啟用之後，國內生產總值不斷上升，到一二年更加首次爬過香港頭添，你都咪話唔犀利。開講有話，唔賭唔知運氣好，正如權威分析話齋，香港具備開展博彩業條件，如果發展得宜，預期可以為本地生產總值每年帶來逾兩個百分點，即係相當於超過四百億元嘅收益。總而言之，大嶼山發展乜都好，點都好過港府乜都唔做，一味等運到，係咪？
正所謂，有賭未為輸，愛拚才會贏。買大細起碼有一半贏面，但如果香港繼續不思進取，坐困愁城，結果只有一個，就係齊齊玩完！