政情：蔡惠宏派隻「靚仔」爭打吡

蔡醫生憶述，四年前喺澳洲一場拍賣會上見到啱啱戒奶嘅「好靚仔」，佢眼仔睩睩，鼻高且直，加上頭部標記好靚，即時覺得好啱眼緣，於是決定以廿幾萬港元買下。「好靚仔」受訓初期表現並唔突出，太溫馴，又鍾意咬衫同人玩，不過後來漸漸展現實力，至今出賽十二場，八次躋身三甲，包括五次冠軍，潛力無限。

資深馬主 盼再奪殊榮

蔡醫生話，依家每周會去探望「好靚仔」兩次，餵佢最愛食嘅紅蘿蔔，又會用相機紀錄家人與馬匹相處嘅點滴，好似佢囡囡就特別鍾意同愛駒合照，話愛駒識得望鏡頭喎！佢名下雌馬「勝威旺」亦曾奪得打吡冠軍，若今次「好靚仔」跑出，將成為本港第二位兩奪打吡冠軍嘅馬主。