政情：兩個「問題中年」打爆立會
財爺鬍鬚曾上月底發表財政預算案，之後立法會議員會按傳統向當局書面提問，即係俗稱嘅「入Q」，但近年議員嘅問題都係有增無減。我哋問過立法會秘書處，原來今年班議員入咗足足六千八百二十五條問題，破晒多年紀錄，其中議員陳家洛及張國柱更成為今年嘅「問題王」，兩人分別入咗超過六百條問題，唔通佢哋真係好似卡通片主角櫻桃小丸子咁，問題天天都多、年年都多？
「儲資料做政策分析」
睇番去年嘅預算案問題數目，班議員就入咗五千四百七十一條，同今年六千八百多條相比，即係增加約四分之一。其中去年問得最多問題嘅陳家洛，今年由五百條加到六百一十五條問題，十足通脹一樣。佢話主要問民政、發展、教育，強調冇設硬指標問幾多條問題，目的係為咗儲資料，之後再做政策分析。佢又話，其實係班議員助理好搏殺，想突破自己嘅能力，冇乜怨言喎。
以往都係陳家洛連任做「問題中年」，但今年呢個「寶座」就被社福界張國柱取代，因為佢問咗六百五十七條問題。因乜解究問咁多呢？阿柱就話三分之一問題都係問社署，話晒佢係社福界代表，又話好多福利津貼，都要問受助人數、涉及開支等數字，睇吓每年嘅趨勢。據聞「長毛」梁國雄都入咗三百幾條問題，仲要專問各司局長人工、津貼等，擺明就係為預算案「拉布」而鋪路啦！
答一條花兩三萬公帑
不過，以前其中一個「問題中年」馮檢基，呢幾年就問少咗好多問題，仲解構咗原因。原來政府話答一條問題，要花公帑二至三萬元，計番條數，今年即係要用約一億四千萬至二億元，所以一般問題會留番平時先至問喎。其實各政府部門官員要答晒問題，都唔係咁簡單，計番條數，部門要喺召開財務委員會特別會議前，只係有三個多星期回答頭三千多條問題，剩下就會係預算案三讀前回覆議員，但點樣分段回答都需時，相信金鐘政府總部呢幾個月夜晚都要「燈常開」喇！