中環出更：王維基累莫乃光冇覺好瞓
欲以流動電視牌照「借殼翻生」嘅香港電視網絡主席王維基，連累立法會資訊科技界議員莫乃光（Charles）冇覺好瞓？話說王維基對通訊事務管理局指他擬用嘅傳送制式可能違規，連日舉行記者會同通訊局隔空駁火，本來呢個角力不涉及第三者，但Charles作為業界議員，公眾有合理期望佢會係最適當人選去分析此事，但撞正佢近日身在美國，佢喺社交網站日前留言話，最近喺美國東岸晚晚冇得瞓，一路接受傳媒訪問至半夜四點鐘。
莫與方剛入醫保計劃小組
講番Charles今次美國之行，其實佢先後到過華盛頓、波士頓等城市，其中離開華盛頓前參觀咗新聞博物館，形容係「非常好嘅公民同歷史教材」，提議香港新聞界係咪可以搞番個類似嘅永久展館喎。
講開又講，早前有指立法會再現退會潮，有傳話Charles同批發及零售界議員方剛都榜上有名，但原來只係一場誤會，查實佢哋二人都有加入醫療保障計劃小組成為新任成員。
卓妮