中環出更：老牌子第三代 破舊立新
紅色膠水桶、細個返學用嘅太空篋、塑膠漱口盅、甚至喺大牌檔見到嘅經典膠櫈咁，呢啲都係唔少市民嘅集體回憶。卓妮日前喺香港塑膠業廠商會晚宴上，除咗見到唔少業界老行尊外，仲遇到港產品牌紅A塑膠產品創辦人梁知行孫女梁馨蘭（Jessica）添，佢話公司近期請咗一班後生設計師幫手，打算轉型走年輕人產品路線，莫非佢想將呢門傳統生意打造成創意工業？
轉型年輕路線
面對環保及市場競爭激烈，接手家族塑膠產品生意四年多嘅Jessica話，佢哋計劃將沉寂多年嘅品牌轉型，所以吸納咗一班年輕設計師幫手，希望打破幾十年來傳統家品嘅形象，採用更多色彩及設計元素，務求設計和實用兼備。佢哋去年仲開始同理工大學合作，由學生分組設計新款膠櫈，再研究生產同推出市場嘅可行性。
礙於成本上漲問題，近年唔少工廠都北移，「香港製造」呢四個字已經買少見少，但Jessica就話冇諗過將廠房搬返內地，事關佢哋位於新蒲崗嘅廠房係自置物業，唔使捱貴租，令成本可在控制範圍，得以維持本地生產。
當晚同場仲有唔少業界前輩現身，好似以生產膠鴨仔揚名、有「變形金剛之父」外號嘅工業家林亮、建樂士企業董事長孫啟烈及身兼香港塑膠業廠商會主席嘅兒子孫榮聰等。會長陳偉文話，對業界前景非常樂觀，認為內銷及環保係大趨勢，打住本地品牌旗號開拓內地市場始終有一定優勢，而且塑膠製品非常生活化，每一個層面都有出路喎。
卓妮