玲姐（清潔部主管）：「阿蓮，你清潔咗老闆間房未呀？佢今日會早啲返到公司呀。」
蓮姐：「係嘅玲姐，我依家即刻去。」
玲姐：「阿蓮，你隻手做咩紅晒？仲甩皮添！」
蓮姐：「可能有啲皮膚敏感，過兩日應該無事。」
玲姐：「你用清潔劑時點解唔戴手套呀？皮膚炎可大可小，嚴重的話會影響日常生活同工作能力！」
蓮姐：「有無咁誇張呀？」
玲姐：「你快啲去清潔雙手，之後戴番對手套先做嘢喇。」
下午，玲姐於飯堂見到阿蓮也正在吃午飯。
玲姐：「阿蓮，你隻手點呀？最好去睇醫生喎。」
蓮姐：「唔需要喇，我搽啲藥膏就無問題。」
玲姐：「阿蓮，你可能係接觸性皮膚炎，呢個病係常見職業病之一，大致可分為『刺激性皮膚炎』同『過敏性皮膚炎』兩種。刺激性皮膚炎主要係接觸刺激物，例如啲清潔劑咁，令皮膚受損引發免疫系統反應，導致可見性皮膚炎症；至於過敏性皮膚炎就係接觸到致敏物質，初期皮膚無明顯反應，但持續接觸更長時間，就開始出現皮膚炎。如果皮膚發紅、痕癢、脫皮、腫脹和出現水泡，都可能係接觸性皮膚炎病徵。嚴重的話會令皮膚裂開同流血，甚至蔓延全身，所以千萬唔可以輕視職業性皮膚炎嘅傷害。」
蓮姐：「玲姐，咁我都係去睇醫生先。我以後都要多啲認識工作地點嘅化學品，遵守防禦措施，同埋用合適嘅個人保護裝備先開工啦！」
職業安全健康局
www.oshc.org.hk