曾幾何時，香港醫療水平喺亞洲可以講係名列前茅，令港人引以為傲，可惜時移勢易，隨着近年服務質素每況愈下，香港醫療優勢逐漸消失，連台灣都後來居上，講起真係可悲。
功夫茶唔係滅香港威風，長他人志氣，而係有事實根據。呢，菲律賓人質事件中受槍傷導致下顎嚴重損毀嘅易小玲，喺香港歷經三十三次下顎整形手術仍告失敗，而轉去台灣接受一次手術即告成功，得以重現笑容；仲有吖，罹患先天性單邊肺部發育不全綜合症，只有半邊肺功能嘅女嬰茵茵，喺香港無醫生敢為佢做手術，同樣要遠赴台灣求醫，結果手術成功，轉危為安。
唔怕唔識貨，最怕貨比貨，呢兩位一度瀕臨絕望邊緣嘅病人，喺香港群醫束手，一轉到台灣就重獲新生，你話香港醫學界係咪丟架吖？正如業界人士話齋，以前香港自命醫療系統完善，又有人才，水準高過台灣，依家搞成咁，真係要好好反思究竟出咗咩問題。
係咯，香港醫療點解會淪落到咁嘅地步呢？原因可能好多，但歸根究柢都係因為官僚無能。前食衞局局長周一嶽執掌醫療系統八年，唔止搞到公立醫院亂象叢生、事故不斷，私家醫院亦唔好得去邊，收費昂貴、態度惡劣，早就備受詬病。最離譜嘅係，醫學界近年更被「白色恐怖」籠罩，例如周一嶽口出狂言令易小玲手術遭拖延、心臟科專家余卓文「被封刀」等等，簡直無奇不有。
當然喇，前線資源不足，醫護工作超出負荷，亦係本港醫療水平每況愈下嘅主要原因之一。港府一味諗縮數，醫療資源縮完又縮，加上醫管局管理混亂，肥上瘦下，為維護自己人利益，不斷以高薪聘請顧問，大搞山頭主義，導致內部競爭愈來愈激烈。醫院聯網之間講到爭經費、爭人手、爭贊助，冇一個肯蝕底，唯獨面對奇難雜症嘅時候，個個耍手擰頭。今時今日，前線醫護人手短缺，十個煲七個蓋，唔出事至奇喇。唔怪得連醫生都擔心，隨着醫療水平逐步下跌，將來自己有病時，可能搵唔到有水準嘅醫生為自己治療。
嗱，呢啲咪叫能醫不自醫囉。係人都睇到香港醫療有咩問題，病根喺邊度，可惜當局一直諱疾忌醫，根本無勇氣動手術。現屆政府話就話成立檢討督導委員會，準備整頓醫管局，最怕虎頭蛇尾，結果又係得個吉咋。
唉，回歸前香港樣樣都好，回歸後樣樣都退步，整體競爭力下跌不特止，連醫療地位都不及台灣，真係令人不堪回首，唔通往事只能回味？唔通香港就咁玩完？