鬍鬚曾理財，一味靠估，然後再靠嚇，咁就唔經唔覺做咗好多年「中產」，有時食吓熱辣辣嘅蝦餃，周不時睇吓法國電影歎吓咖啡，呢個中產財爺，認真羨慕死買唔起樓申請唔到居屋嘅另一類中產！
李笠翁有篇談柳的美文，五百零字，寫得極有情致，佢有一番議論，指「柳貴乎垂，不垂則可無柳，柳條貴長，不長則無嬝娜之致，徒垂無益也。」嗱，呢啲議論簡單精警，不僅表達咗審美觀點，更講出了所以然！
然而，觀乎鬍鬚曾嘅「理財」理念，一時一樣，成日發口痕，早幾日又發表網誌，先用飛機防撞預警同龜兔賽跑兩個比喻嚟解釋其所謂「理財哲學」，之不過佢引喻失義，一時龜一時兔，又話白兔不論龜走得多遠，只要佢一瞓醒，放個屁就已追趕上烏龜；阿哥，比賽場地改咗喺山坡啦，隻龜一縮入龜殼，一滾，就咁贏咗白兔一條街喇！
總之，鬍鬚曾係攬住老婆當大賊嗰種男人，香港明明擁有金山銀山，佢就一味「想當然」，又飛機防撞預警、又龜又兔，一時話審慎理財，唔會容許香港出現結構性財赤，一時又話七年後又會出現，一時話收入多，一時話收入少……
阿哥，咁理財法，香港點會有明天啊！只會有你呢種豐衣足食嘅高官中產！好心唔好成日「想當然」，鬍鬚曾，你已經「想當然」咗好多年，年年估錯數，年年噏來噏去嗰兩三句，如此想當年，係老朽呢種過了花甲，才會想「十八歲給我一個姑娘」的「想當年」，想當年老朽追過的女仔，個個都變明日黃花、肥師奶啦！即便想了，難道就會見到鄭多燕？
理財又豈可成日想當然，係龜係兔，講乜都假，咁「想當然」嘅應使則使，不肯面對實際困境，試問又如何能挑戰迷思、破除成見？鬍鬚曾，你嘅理財法，根本就係老鼠拉龜！