政情：新聞處長要重新學講嘢
新任新聞處處長聶德權（Patrick）上場後，預咗未來成日要開聲講嘢，做好政府大公關嘅角色。不過Patrick自爆最近開始睇言語治療師，好似小朋友咁學習點樣發聲講嘢喎！究竟發生咩事呢？
聲帶生繭 睇言語治療師
Patrick解釋話，其實係佢喺農曆新年期間患上感冒，一路感冒未清令到聲音低沉，睇完耳鼻喉科後，發現佢嘅聲帶生繭，幸好唔係息肉，無需做手術。專科醫生建議佢為聲帶周邊嘅肌肉做多啲運動。聲帶點樣做運動？真係考起人。Patrick唔敢怠慢，即刻搵資料了解聲帶發聲理論，同時開始睇言語治療師練習聲帶周邊嘅肌肉，包括學習小朋友發聲嘅方法。不過講到尾，醫生交代話最好都係講少啲嘢喇！
醫生嘅說話一定要聽，Patrick最近真係少說話，多做事。不過最近佢陪特首到北京出席全國人大開幕式，反而唔見新聞統籌專員馮煒光，即刻惹來外界揣測。Patrick解畫話，佢同馮煒光已就陪同特首外訪有晒分工，如果其中一人陪特首出訪，另一人就會留守香港喎！唔知Patrick呢個解釋能否釋除外界疑慮呢？