政情：標時大龍鳳公僕得個吉
香港係咪能夠推行標準工時未有定論，但靠公帑營運嘅醫院管理局轄下支援職系員工，早已實行每周工時，計埋飯鐘都只係四十四小時，公務員事務局面對公務員「先行先試」帶頭推行標準工時嘅壓力，惟有嗱嗱聲郁手檢討第一標準薪級員工嘅工時。大半年過去，公務員事務局尋日向立法會提交研究結果顯示，七千五百個第一標準薪級員工之中，只得四十個嘅工時有得減，包括理髮師同爆炸品倉務員呢啲成個職系只得一個起、兩個止嘅員工。政府搞場大龍鳳最終得個吉，前線員工唔嬲就假。
理髮師花王有份
去年六月公務員事務局宣布，研究為月薪一萬至一萬三千元第一標準薪級職系員工縮減工時嘅可行性，即係將原本每周四十五小時淨工作時數，放寬至包飯鐘都只係四十五小時。局長鄧國威當時事先聲明，減工時須符合三大先決條件，即毋須額外財政資源，唔涉及額外增加人手兼且要維持現有服務水平，一句講晒，即係想「無痛」減工時。
結果七千五百個第一標準薪級公務員中，只得四十人可以減工時，包括成個職系得一人嘅理髮師，同埋相信係「花王」嘅園務工人，另有兩名爆炸品倉務員受惠，以及三十六個物料供應服務員。其餘逾七千個一級、二級工人等就維持現狀。據了解，碩果僅存嘅理髮師同園務工人分別隸屬衞生署同消防處。
稱冇乜簡化空間
當局解釋，原本有一千五百人符合減工時嘅條件，但由於同一職系內部分員工可以減，部分唔可以，政府為貫徹「相同職系，相同規定工作時數」嘅原則，決定犧牲為數最多嘅一級、二級工人，率先處理得一、兩個人嘅職系。當局仲話，已經冇乜空間再簡化工序，換句話講，其他員工期望減工時已遙遙無期。
政府使咁多時間搞場大龍鳳，最終只係得花王同理髮師等百分之零點五嘅第一標準薪級員工可以減六小時工時，政府有幾大決心推行標準工時，大家有眼睇喇！