中環出更：中西區會議建制派冇再甩轆
中西區區議會公民教育工作小組上周舉行會議，建制派同白鴿黨許智峰因係咪開放會議而爭拗，最後更搞到報警收場。該工作小組尋日再舉行會議，就餘下兩項涉及推廣《基本法》嘅活動撥款申請進行討論，在場建制派議員打醒十二分精神，其中李志恒一改上次表現「甩轆」，一開始就義正詞嚴讀出中西區區議會會議常規，包括規定區會大會及委員會會議要公開，但呢個規定唔適用於工作小組。
許智峰挑機失敗
許智峰就挑機提出五項臨時討論議程，包括小組會議開放予公眾及傳媒安排等，建制派以區會秘書處喺會議前個多小時先收到為由，以五票反對對兩票贊成，否決要討論以上臨時議程。
工作小組其後審議餘下推廣《基本法》嘅活動撥款，李志恒等建制派再同許針鋒相對，最後喺少數服從多數下，工作小組決定不會重審任何申請。
臨近會議結束前，中西區議員張翼雄更突襲白鴿黨，懷疑「福安社會服務社」呢個有份申請撥款嘅機構同許智峰關係密切，許智峰回應時矢口否認有關指控，並鄭重申報同該組織無聯繫，呢次會議亦就咁落幕。
卓妮