中環出更：鄰輔會晚宴名人爭相行善

紛出錢買枱捐墨寶

Wilfred出力「發功」，一為善事，亦為親情。佢預告公司稍後會再捐款，教育及藝術等範疇都係考慮之列。名媛林李婉冰係晚宴籌委會聯席主席，林太成功游說「饒宗頤學術館之友」主席孫少文捐出饒老墨寶作慈善拍賣。林太話，鄰舍輔導會過去為唔少自閉症人士提供支援服務，好有意義，希望晚宴為該會籌募更多經費，為自閉症患者送上更多關懷。

東華三院前主席李三元都有買枱支持，仲捐出六位數字做善事，李家大公子李曠怡及細仔李仲怡亦齊現身。卓妮見李仲怡激瘦咗兩個碼，原來佢瘋狂愛上健身，每日唔舉過勁量級啞鈴就唔安樂。日子有功，短短一年時間就練出六舊腹肌。佢話嚟緊將會參加全球CrossFit混合健身訓練競賽，若成績突出，有望代表香港競逐喺首爾舉行嘅總決賽。佢仲話，健身帶畀港人更多正能量喎！

王英偉夫婦（左二及一）買枱撐細佬王英明（右二），林李婉冰（左三）及籌委會委員文蘇倩怡（右三）出面招呼，右一為王英明太太。

李三元（中）細仔李仲怡（右）愛上健身後成個人fit晒。左為李家大仔李曠怡。

精神科醫生曾繁光都以鄰舍輔導會主席身份滿場飛招呼賓客，其千金曾名翠（Michelle）都嚟打氣。Michelle唔只同佢爸爸成個餅印咁，連興趣都一樣，佢依家喺中大醫學院讀四年級。咁係咪寄望女兒成為名醫呢？曾繁光就話，由得囡囡自由發展，女大女世界喎！

卓妮