假作真時真亦假，有機產品竟有詐。有機食品近年大行其道，弊在當局執法甩漏，令奸商有機可乘，A貨「有機」食品成行成市，市民將農藥、抗生素、重金屬同激素食晒落肚，仲以為自己過緊「綠色生活」，問你驚未！
功夫茶唔係靠嚇o架，嗱，浸大香港有機資源中心對市面上有機蔬菜及水產進行抽查，結果好得人驚。佢哋調查咗四百四十個菜檔，超過兩成一即係近九十檔聲稱出售有機菜，當中只有十七檔獲有機認證，實際比例唔到百分之四，其餘產品冇憑冇據一味靠噏。水產方面更加離譜，抽查咗三百七十一個魚檔，百分之五點四即係二十檔，話賣嘅係有機水產，但只有兩檔提供到證明，比例得百分之零點五咁大把。
另外，抽查嘅蔬菜樣本話就話符合香港安全標準，但其中有八個樣本重金屬含量超出澳洲、歐盟等國外標準，本港到底係乜鬼安全標準？
係人都知，內地黑心食品五花八門，幾乎「無食不毒」，唔止同胞冇啖好食，本港亦難幸免。以往周不時發現有內地供港菜場以次充好出蠱惑，導致毒菜流入本港。唔該港產官僚打醒十二分精神（目及）到實，防止毒菜攻破防線。
講番A貨「有機」菜同魚呢筆，家陣受化學污染嘅食品無處不在，防不勝防，市民唯一可以做嘅就係喺飲食方面作出選擇，好似進食有機蔬菜同魚肉咁。問題係，絕大多數普通市民都冇呢方面嘅專業知識，唔知點分辨邊啲產品真係有機，邊啲係無良奸商以假亂真嘅山寨貨。至弊有關部門有眼無珠執法甩漏，畀人乘「機」博懵，搞到本港「煮婦」買咗假冒「有機菜」仲以為係「正菜」，你話係咪靠害吖。
仲有吖，調查亦發現，雖然假冒有機產品數字同舊年差唔多，但係有菜檔玩蠱惑，譬如偷換概念，用「新界菜」、「手摘菜」嚟代替「有機」字眼等，市民一個唔覺意，隨時可能中招，畀多咗錢事少，食咗唔應該落肚嘅嘢影響健康事大吖。
講開又講，港府後知後覺，把關被動，導致食品安全防線失守數不勝數。嗱，舊年初，廣州及佛山先後爆出大米及米製品含致癌物質鎘超標，連港人經常食用嘅東莞米粉亦領嘢。毒米粉兵臨城下，食物安全中心幾個月之後至公布多批次大米及米製品鎘超標，仲要喺輿論不斷施壓之下，至公布涉事品牌及廠商名單，簡直就係攞市民健康較飛。
前車之鑑，不可不察。有機食品安全再響警號，唔該食衞局阿頭咪再學前任周一嶽咁吊吊揈，快啲諗計，除咗完善有機食品標籤監管，鼓勵農民和漁民申請認證，最緊要係加強巡查，嚴格執法，如果有乜冬瓜豆腐，呢隻鑊你班官一定孭硬o架！