政情：假孕婦嗌得真 嚇親梁卓偉
無國界醫生搞嘅野外定向賽尋日喺長洲開鑼，香港大學李嘉誠醫學院院長梁卓偉（Gabriel）都去打氣。大會以去年發生嘅菲律賓風災為題，搭建模擬手術室，Gabriel喺參觀期間，突然有位「大肚婆」大叫作動，嚇到佢彈起，仲想衝前幫手接生。
高官議員甩底定向賽
Gabriel係習醫出身，要喺戶外接生，當然難唔到佢。但佢定過神後發現，該位「大肚婆」原來係大會請來嘅話劇演員。嗌得咁逼真，Gabriel都寫個服字，仲話：「我真係以為要幫手呀。」佢笑言醫學院下次考核醫生，可以考慮搵呢班專業演員幫手。Gabriel又話，做醫生除咗要醫學知識豐富外，仲要有「仁氣」，希望醫學院初哥學習成為仁醫。
今次定向比賽本來邀請名人組隊鬥一番，但名人竟然通通甩底。有份報名嘅運輸及房屋局副局長邱誠武出賽前兩日話有事退出。立法會議員陳家洛尋日朝早亦發燒退陣。隊友無晒影，立法會議員胡志偉得番一支公，最後都只好退出。