政情：高永文晚晚做「人肉廚餘機」
講起廚餘，好多人自然會諗起大嘥鬼，繼而聯想起同大嘥鬼餅印咁嘅環境局局長黃錦星。原來一向關心市民健康嘅食物及衞生局局長高永文喺處理廚餘方面一樣「不遺餘力」。事關佢尋日擔任全城有機日主禮嘉賓，演講時突然自爆每晚返到屋企都會化身成「人肉廚餘機」，專食廚餘咁話。
工作夜歸 「消滅」餸尾
高永文話，每日到咗傍晚六、七點左右，就會收到call，問佢返唔返屋企食飯。但佢平日工作鬼死咁忙，所以屋企通常唔使等佢開飯。佢每晚十一點收工返到屋企打開雪櫃，都會發現屋企人留低一大堆餸菜，佢就自自然然會化身一部「人肉廚餘機」，將屋企人食剩嘅餸菜通通「消滅」。
講到呢度，高永文就開始邀功啦，話自己化身「人肉廚餘機」，其實對同事黃錦星工作範圍作出一定貢獻，減廢方面功不可沒咁話。