政情：田少曳曳玩出火
自從特首梁振英（CY）上場後，自由黨變成建制派中嘅反對派，黨魁田北俊（田少）不斷同特區政府作對，先係喺立會向CY提出不信任動議，後來仲支持引用特權法徹查免費電視發牌風波，總之同特區政府嘅關係幾乎跌至冰點。身兼全國政協委員嘅田少日前上京出席全國人大及政協兩會，仲話只係有嗰句講嗰句，唔覺得發表批評政府言論有咩問題。不過中聯辦協調部部長沈沖就疑似批評田少，不點名話有人嘅做法難以理解同接受，仲話別有用心嘅意見對推動特區政府依法施政絕無好處。田少今次玩嘢玩出火，畀人噴到一面屁，真係戥佢面懵。
別有用心 難令人理解接受
全國政協香港委員尋日喺北京舉行分組討論，田少發言時就話自己喺香港唔敢以政協身份發言，尤其係講一啲批評特區政府嘅言論，因為唔知道係唔係得到中央授權。沈沖總結時終於還以顏色，佢話特區政府係中央政府任命，所以政協委員係應該支持特區政府，又話只要政協委員基於支持特區政府依法施政嘅原則，提出有建設性嘅意見，佢個人認為可以理解，但若然如果有人提出意見時別有用心，並唔係善意幫助推動特區政府依法施政，就難以令人理解同接受。
沈沖無點名話邊位政協委員唔係善意又別有用心，不過都不言而喻啦。今次係田少扮建制派曳仔以來，首次有中聯辦或北京官員對佢當頭棒喝，所以都唔只係特區政府對佢不滿、全體主要官員杯葛自由黨二十周年黨慶咁簡單，甚至超出特區政府同田少之間嘅「私人恩怨」囉。
忽然話唔敢以政協身份發言
其實田少以立法會議員身份發言都講到夠啦，對特區政府都已經批評得好盡，忽然又話自己唔敢以政協身份發言，不明就裏嘅人仲會以為佢係隻鵪鶉咁唔敢講嘢添，而且佢做咗全國政協已經超過十年，又點會唔知全國政協應該講乜嘢？所以佢分明係玩嘢。特區政府係中央任命，全國政協亦都係，對於一啲做事方式「難以理解同接受」又不存善意嘅全國政協，下次唔好任命佢咪得囉。