政情：中環出更：「元秋」有情義 蔣麗芸接受花名
立法會議員蔣麗芸（阿Ann）做咗議員後不時發表出位言論，又用聲如洪鐘嘅聲線吸引大家注意，被冠以「政壇元秋」嘅稱號。佢尋日接受電台訪問時，透露自己開始接受「元秋」呢個花名，皆因戲中嘅元秋雖然講嘢聲大夾惡，但總算係個有情有義嘅人，又話落區嗰陣不時有街坊叫佢做秋姐。
細妹勸講嘢細聲啲
外界不時揶揄阿Ann嘅言論，阿Ann就話自己嘅言論問題不大，仲話工業家爸爸蔣震都支持佢繼續為民發聲，但妹妹蔣麗萍就建議佢講嘢細聲少少。阿Ann又話同僚劉慧卿成日都聲大大咁質問政府，覺得外界淨係批評佢唔多公道喎。
阿Ann喺農曆年間率領逾四百名團友「佔領郵輪」超過半日，要求旅行社賠償郵輪未能停泊越南下龍灣嘅損失。佢尋日重提事件時自爆上船時已經非常小心，連去船上餐廳食飯都戴住太陽眼鏡，唔想俾其他旅客認出佢係立法會議員。
不過佢嘅老公梁海明就提醒佢，話戴住太陽眼鏡食飯反而更加惹人注目，叫佢做番自己就得。點知阿Ann後來成為眾人求助對象，真係令佢始料不及。
卓妮