功夫茶尋日用「逆水行舟，不進則退」形容香港嘅大學世界排名急速下滑，今日講香港整體競爭力，究竟應該用邊句成語最貼切呢？睇嚟有兩句成語一定走唔甩，就係「江河日下」、「一落千丈」喇！
嗱，唔係功夫茶亂噏。城中富豪接受內地財經網站訪問時慨嘆，港資企業不論喺內地定國際，競爭力都不復當年勇；本地經濟如果要尋找出路，關鍵在於提高長遠競爭力，而要捉住下一個大機遇，就一定要抓緊創新科技及培育人才咁話。城中富豪仲話，近年民粹主義愈演愈烈，香港變成被寵壞了的孩子，再咁落去，不出五、六年，香港就會面目全非呀。
其實使乜等五、六年吖，依家已經面目全非喇。回歸前，香港係一隻會生金蛋嘅肥鵝，人見人愛，車見車載；點知回歸之後，肥鵝逐漸變成瘦鵝，好似風乾嘅臘鴨咁，死氣沉沉。所以咯喎，如果話本地競爭力無復當年之勇，所謂嘅當年應該係講緊幾十年前，香港近年仲邊有競爭力可言吖。
就講創新科技吖，港府咁多年嚟做過啲乜吖？港產官僚最叻就係吹水，又話打造科技港，又話推動創新科技產業，又話發展知識型經濟，結果全部都係大隻講。係人都知，廿一世紀係科技時代，如果前朝貪曾政府肯做好自己份工，落足心機推動科技產業，本港競爭力就唔會每況愈下，一落千丈喇。咪話功夫茶唔提醒，亞洲四小龍互爭長短，南韓嘅科技產業固然如日方中，台灣、新加坡亦根基雄厚，唯獨香港仲喺度發緊夢，一味炒樓炒股，塘水滾塘魚，競爭力唔畀人拋離九條街至奇喇。
至於講到培育人才咯喎，更加不堪提起。唔使講咁多，就睇香港嘅大學排名年年下滑，跌跌不休，畀主要競爭對手新加坡愈拋愈遠，就知發生乜嘢事喇。試諗吓，連高等學府都不思進取自甘墮落，香港仲有乜嘢希望吖？
講嚟講去，都係前朝政府種嘅禍，佢哋咁多年嚟一味胡混度日，蹉跎歲月，搞到本港競爭力不進反退，江河日下。當然啦，香港變咗被寵壞嘅孩子，港府無能激發民怨固然係禍源，政客無良搞風搞雨亦難辭其咎。經濟民生最易受政治影響，香港本來已經陷於政治泥沼不能自拔，家陣仲隨時因為政改爭拗而一拍兩散添，香港何去何從，危機感比競爭力滑落更加令人擔心。
正所謂，福禍無門，唯人自招。香港究竟係繼續沉淪，坐以待斃，定係痛定思痛，重回正路，香港人係時候作出抉擇嘞！