政務司司長前政治助理張秀麗去年以照顧跌親嘅媽媽為由，做咗一年就請辭，當時令外界紛紛揣測，傳佢同上司林鄭月娥不和、嫌政府呢個「廚房」太熱而「跳船」。
不過，一切謎底尋日終於解開，政府新聞處公布，張秀麗獲准居家就業（home office），以屋企為辦公室，向客戶提供同傳訊有關嘅服務。
負責審批問責制官員離職後工作嘅諮詢委員會，尋日透過新聞處公布張秀麗嘅去向，透露佢份新工包括提供公關服務及為撰寫專題文章提供意見。張秀麗曾任職多間傳媒機構，亦曾任香港賽馬會公共事務顧問，離職後理應成為公關界嘅搶手貨，但佢情願留喺屋企返工，相信係為咗可以一邊工作，一邊照顧媽媽，一舉兩得。