政情：同人唔同命 工黨瀕包艇
近日被建制派陣營公開質疑其公正性嘅香港大學民意研究計劃懶理批評，尋日按受訪市民對政黨嘅熟悉程度同支持度，公布「十大政治團體」排名，但十大政團評分幾乎全線下跌，冇一個政團評分合格。其中最騎呢嘅竟然係職工盟蟬聯第一，相反由職工盟秘書長李卓人（阿人）一手催生嘅工黨，知名度就長期墊底，十大不入之餘，仲跌到尾二，認真係同「人」唔同命喇！
港大上月十七至二十日、即財政預算案發表前訪問約一千名市民，除咗職工盟同工黨嘅知名度有天淵之別外，民協就跳升三位排第二，工聯會同新民黨則各跌一位，排第三及第四位，之後排名係其他泛民主派及建制派政團。而跌出十大政團榜嘅除咗工黨外，仲有街工及支聯會。
工聯仆直響警號
阿人當年同張超雄、何秀蘭等同路人組織工黨，就係想藉工黨打響名堂，為壯大幾位同路人喺立法會嘅勢力鋪路。不過，同「人」唔同命，工黨同職工盟一樣由阿人苦心經營，但工黨到而家喺區議會一個地區樁腳都冇，似乎阿人嘅如意算盤仲未打得響。究竟係啲黨友唔爭氣吖？定係阿人顧得職工盟，顧唔到工黨發展呢？
民調仲發現有八個政團評分下跌，工聯會更急瀉至一九九一年民調開展以來嘅新低，唔知同身兼行政會議員嘅該黨榮譽會長鄭耀棠早前接受航空公司豪華收機團款待，以及對強積金對沖等勞工議題長期縮埋有冇關係呢？不過無論如何，今次民調確實為工聯會敲響警號，如果佢哋再唔變陣，明年同後年嘅兩場大選舉肯定凍過水。
白鴿評分創新低
另外，民主黨（白鴿黨）亦唔好得多，雖然市民認知率高達八成七排第二，但最新評分就破九四年創黨以來新低。由於民調喺該黨前主席「AV仁」何俊仁喺預算案宣讀期間睇艷照事件前進行，相信仲未反映市民對AV仁醜行嘅不滿，話唔定該黨喺下次民調評分大跌都未定。