中環出更：鬍鬚曾使人唔使本 雷公「眼冤」
由財政司司長曾俊華（鬍鬚曾）成立嘅長遠財政計劃工作小組，日前公布詳細報告，為鬍鬚曾喺財政預算案提出「香港七年後出現結構性財赤」嘅恐怖預言解畫，仲提出七招建議延後財赤出現。有官場中人爆料，鬍鬚曾對報告建議設立嘅「未來基金」好有興趣，食髓知味下打算再緊急召集小組委員歸隊，深入研究基金用途及七招建議嘅可行性。
做完手術冇得抖
鬍鬚曾對「未來基金」忽然興起，令到原本諗住可以「收工」嘅專家同學者，焗住歸隊踢埋下半場。被急召歸隊嘅包括科技大學經濟學系主任雷鼎鳴（雷公），原來雷公打算今年休假一年，但報告一出，雷公不但要連日落區解讀報告內容，就算預約咗今日做白內障手術，明日都冇得抖吓，要變身「獨眼龍」上電台節目解讀報告，莫非鬍鬚曾想收賣人命？
雷公透露，小組去年已經開咗五十幾個鐘頭會議，估唔到報告出爐都未放得工住。雷公仲話，小組報告原本仲有啲更「恐怖」嘅情節，只係唔想嚇親市民刪減咗咋。唔通鬍鬚曾想收埋啲嚇人數字備用，留返明年預算案再嚇港人？
卓妮