中環出更：無懼恐襲李鋈麟飛昆明扶貧

雲南昆明血腥恐怖襲擊案件，震驚中外，喺內地投資嘅香港富商、名人都為之嘩然，紛紛暫避遊昆明。不過，東華三院副主席李鋈麟（Alan）就相信恐襲只係個別事件，今日會照飛昆明展開扶貧工作，佢笑言喺內地怕飲到假酒多過遇恐襲，所以此行連保鏢都唔使請喎。相反香港品牌總商會副會長陳曼芝（GiGi）就好擔心身在昆明嘅女兒，「下令」女兒火速返香港。
總理黃業光夫婦（左一及二）買枱支持善舉，陳曼芝（中）、香港品牌總商會創會會員黃守迎（右二）及香港鞋業總會副秘書長鄧乃蔚（右一）獲邀出席。
總理黃業光夫婦（左一及二）買枱支持善舉，陳曼芝（中）、香港品牌總商會創會會員黃守迎（右二）及香港鞋業總會副秘書長鄧乃蔚（右一）獲邀出席。

東華三院日前喺洲際酒店舉行一百四十三周年慈善晚宴，大玩八十年代懷舊舞台主題，一眾董事局成員盛裝打扮赴會，衣香鬢影。話題離不開昆明恐襲案，咁蹺Alan今日會飛往當地扶貧，贈四百張床畀山區學校，方便學童留宿。不過，依家風頭火勢，佢唔驚遇意外？Alan就拍心口話，昆明治安一向唔錯，避免去人多嘅地方就冇事喎。

陳曼芝急召愛女返港

不過，GiGi對昆明恐襲就驚到徹夜難眠，事關當佢睇電視新聞見到昆明火車站血肉橫飛，即時嚇到彈起，馬上打畀身在昆明做作家嘅女兒，得知對方平安，即時鬆一口氣。幸好囡囡願意在日內飛返香港向家人派定心丸，又會幫媽咪搞珠寶展，暫時唔返昆明住喎。

李鋈麟（右一）與候任副主席陳祖恒（左一）、副主席何超蕸（左二）及馬陳家歡（右二）齊出動支持慈善晚宴。（嚴少阡攝）
  • 李鋈麟（右一）與候任副主席陳祖恒（左一）、副主席何超蕸（左二）及馬陳家歡（右二）齊出動支持慈善晚宴。（嚴少阡攝）
「生蛇」剛愈嘅施榮恒（右）擔任晚宴籌委會主席，太太李婉儀（左）全力打氣。（蘇文傑攝）
  • 「生蛇」剛愈嘅施榮恒（右）擔任晚宴籌委會主席，太太李婉儀（左）全力打氣。（蘇文傑攝）

東華三院第一副主席兼晚宴籌委會主席施榮恒（Ivan）就痛斥暴徒行為好冷血，見無辜百姓被害感到心痛。Ivan早前不幸「生蛇」被病痛入侵，搞到頭腫眼腫，幸好喺中西醫夾攻下，火速痊愈，無礙籌備慈善晚宴。

卓妮

第一手消息請下載on.cc東網iPhone/iPad/Android/Windows Phone Apps