政情：田少黐埋工黨 捐酒籌款
自由黨最近同泛民主派愈走愈埋，十足糖黐豆，早前竟然就香港公立醫院醫生不足問題同白鴿黨合作，令人覺得該黨決心轉型做反對派，同反中亂港嘅泛民政黨聯手批評政府。
李卓人唱歌被「滅聲」
前晚另一泛民政黨工黨，舉行成立兩周年籌款晚會，自由黨黨魁田北俊又異常慷慨，捐出一支名酒畀工黨拍賣籌款，底價八千元，最後由與工黨友好嘅空中服務員工會以一萬元投得。
工黨形象一向草根，又支持標準工時立法同反對輸入外勞，同自稱代表工商界同中產嘅自由黨，喺各方面都係格格不入，但田少仍然幫對方籌款，睇嚟佢哋已經一家親！除咗拍賣，工黨議員張超雄同李卓人又喺晚會上即場彈結他同獻唱籌款，其中張超雄彈結他尚算合格，但阿人嘅歌喉就比得上「嶽曲」，最後有人玩嘢捐出五百元，要求阿人自行「滅聲」，以免影響賓客食欲，認真(火羅)爆！整個晚會即場籌得十六萬元，都算係咁喇。