根據現時《區議會條例》規定，如果區議員未取得區議會同意而連續四個月冇開會，就會喪失區議員資格，原意係防止議員長期「蛇王」，但就被質疑可能構成性別歧視。香港婦聯尋日去信民政事務總署署長陳甘美華，要求修例容許女性議員因為懷孕或產子缺席會議，確保佢哋唔會因為生仔冇咗個議席。婦聯同時又建議區議會容許男議員申請侍產假，避免影響家庭和諧喎，大家係咪覺得建議好創新呢？
婦聯亦為男性議員發聲，話不滿《區議會條例》冇畀男士放侍產假，仲話以前有男議員申請陪老婆做產後檢查都唔批准，咁樣唔止影響家庭和諧，仲違反政府提倡嘅家庭友善政策，希望當局盡快改善喎。婦聯仲成功爭取咗十八區區議會共一百八十三個區議員簽名支持，希望政府在《區議會條例》加入「家庭友善政策」原素。
原來今屆區議會都有唔少區議員做咗媽咪，例如元朗區區議員劉桂容，佢喺上任之後大肚，去年七月就生咗個囝囝，佢老公就係荃灣區區議員葛兆源。至於中西區區議員蕭嘉怡亦喺去年八月榮升靚媽，佢嘅黨友、深水埗區議員劉佩玉亦同樣係今屆任期內做咗媽咪，唔怪之得呢個規定引起咁多議員關注啦！