政情：發叔話事 強逼收聲

鄉議局唔經唔覺已經講咗組黨接近兩個月喇，期間林偉強又話要招攬成員回巢，又話未來黨員唔可以一腳踏兩船，好似局方已經有組黨方案咁，前日仲話去深圳開集思會添。發叔、副主席張學明、林偉強及各鄉事委員會主席同顧問等約四十幾人，前日中午出發去深圳，尋日下午返港，相信大家會好關心佢哋有冇傾到組黨嘅事。不過，據聞會上竟然主要唔係講組黨，而係傾吓點樣鞏固票源，由明年舉行嘅村代表選舉作為起點，做好選民登記。

傳斥副主席「胡說八道」

發叔回應查詢時話，集思會主要真係傾吓大浪西灣，同不包括土地被納入郊野公園範圍嘅事應該點樣處理。至於有冇傾到組黨呢？發叔就話，組黨需要人力、財力同物力，鄉議局依家好哋哋，唔使執意搞咩組黨嘅，所以今次得出其中一個諗法，就係要鼓勵各鄉盡責任，幫啲村民做好選民登記先喎。

聽聞會上其實都有提到組黨嘅，有成員就認為難以成事，有成員就話總之支持發叔嘅決定。不過，喺分歧中都係有共識嘅，據聞發叔斬釘截鐵話林偉強「胡說八道」，講嘅嘢唔算數，唔代表鄉議局，而其他成員更索性叫林偉強收聲。莫非呢個先係大家搞今次集思會嘅主因？此外，有部分成員就投訴，嗰啲曾經受過鄉紳恩惠、被協助抬橋嘅立法會議員，喺新界人有事時唔幫佢哋出句聲喎，究竟講緊邊啲議員呢？相信有關議員心裏有數喇。