中環出更：盧偉國當選專資會會長
香港專業及資深行政人員協會前晚喺銅鑼灣世貿會搞咗個周年會員大會，選出第八屆理事會成員，工程界立法會議員盧偉國當選新一任會長，身兼建築、測量及都市規劃界議員嘅前會長謝偉銓正式功成身退。盧偉國當選之後話，專資會未來將繼續關心社會、推動香港同海內外交流，以及凝聚會員，發揮專資會各專業同行業精英嘅優勢，表達社會上理性、持平同具建設性嘅意見，為港府出謀獻策。
專資會依家有六百名專業人士同資深行政人員，當中有政界亦有商界。至於點樣凝聚一眾會員，盧偉國就話，佢哋會一如以往咁舉辦交流同聯誼活動，去唔同國家同地區訪問，就社會熱門議題展開政策研究工作，並會繼續推動專資會以培育年輕人為目標嘅「卓育菁莪」計劃，等會員可以緊貼世界、內地同香港嘅變化，尋求進步喎。專資會過去考察過好多地方，包括新疆、馬來西亞婆羅洲等，據講嚟緊仲話去北極添，認真大開眼界。
卓妮