中環出更：內地空管誤航班 名人谷氣
內地郁啲就進行空中管制（空管），本報踢爆一年竟然有四百幾次空管，即係每日多過一次，導致港澳及深圳飛機航班經常亂晒龍。卓妮尋日在馬場同香港鐘表業總會前主席梁青華、理文造紙創辦人李運強及博愛醫院前總理王嘉恩（Albert）講起呢個話題，原來個個都有慘痛經歷。梁青華仲話，行家之間有個笑話，話內地航班延誤屬正常，準時先至係意外喎，認真諷刺。
梁青華話，印象中幾乎次次搭內地航機都會延誤，試過有一次由海口搭下午兩點鐘機返港，竟然延遲至翌日凌晨一點幾先至起飛。佢話，如果將來高鐵通車，咁就有多啲選擇，據聞由香港至廈門高鐵車程只需六小時，咁佢就寧願搭高鐵好過喇！
李運強一講起內地航班延誤就好谷氣，仲話幾十年來都冇改善。咁佢有冇試過因此錯過商機，損失慘重？佢就話，損失金錢事小，引起民怨事大。話時話，航班若嚴重延誤有得申請旅遊保險賠償喎，李運強都冇咁好氣，話班機延誤已經嬲到爆，仲邊記得申索保險吖！
雖然李運強被內地航班延誤激親，但為咗做生意都無奈接受，問佢邊啲航線離譜啲，佢就話自己經常飛海南、重慶、江蘇及遼寧，其中以海南及東北遼寧延誤最嚴重喎！
帶定零食頂肚
既然內地航班延誤係常態，咁一眾名人又有乜計打發時間呢？Albert就話，最緊要帶夠小食，事關內地航空公司唔會特別照顧乘客，通常乘客一知道延遲起飛就一窩蜂搶購小食，所以佢必定帶好多零食做準備。其實航空公司明知經常有空管，就應該做好應變措施啦，為何要乘客受罪呢？
卓妮