開講都有話，唔怕貨比貨，最怕唔識貨，皆因唔識貨嘅後果好可能係入錯貨，被搵笨就戇居啦，一來浪費金錢，二來聲譽受損。偏偏西九管理局似乎一次又一次被搵笨，花費大額公帑買來物非所值嘅所謂藝術品。
東方報業集團之前獨家踢爆過，西九管理局浪擲一億七千萬元公帑，向瑞士收藏家希克購入一批中國當代藝術品，老早就被本地藝術界質疑使咗冤枉錢。跟住落嚟本報再揭發，西九又扑錘斥資一千五百萬元買起一間廢棄壽司吧嘅裝潢，理由係壽司吧嘅枱枱櫈櫈由名師設計喎。
乜嘢名師咁巴閉呀？乜嘢設計咁厲害呀？原來係咁嘅，舊年有人向西九管理局轄下嘅五人臨時購藏委員會建議，購買一間已經結業封塵多年、面積約七百二十平方呎嘅東京清友壽司吧（kiyotomo sushi bar）嘅內部裝潢，事關壽司吧嘅設計師係已故日本藝術家倉俁史朗（Shiro Kuramata），有委員希望呢套作品成為西九主場館M+博物館其中一項鎮館之寶。
好嘞好嘞，問題問題，清友壽司吧名不見經傳，倉俁史朗嘅個人作品網站又未有介紹，似乎藝術家本人都唔係好重視喎，西九會唔會再一次入錯貨呀？你知啦，大師作品都有好壞之分，唔少藝術家將自己嘅劣作棄如敝屣，唔係每一件都價值連城。既然封塵小店嘅枱枱櫈櫈未被收錄於大師個人作品網站，睇怕好極都有限。
更加令人質疑嘅係，點解一定要將成間壽司吧嘅所有裝潢一籃子運來香港先？淨係運輸費都過百萬元喎，條數好得人驚啫。正如身兼西九董事嘅博物館委員會委員單仲偕話齋：「點解要成舊買返嚟？點解唔分散買？第日維修費要幾多？」
再講吖，世界各地嘅博物館多數以散件形式收藏倉俁史朗嘅作品，而唔係好似西九咁瞇埋眼全套購入，而且呢位大師以產品設計聞名，並非擅長於室內設計。
雖然有人質疑西九亂咁使公帑，不過西九最高負責人政務司司長林鄭月娥一於懶理，以「不干預藝術自主」為由拒絕接手跟進，博物館委員會最後以大比數通過斥資一千五百萬元入貨。
藝術呢家嘢，雖然非常之咁主觀，靚與唔靚實在見仁見智，不過始終都有一個指標，就係藝術界嘅口碑。如果藝術界冇人覺得一間壽司吧嘅裝潢有乜特別，你力排眾議唔係叫做獨具慧眼，而係叫做有眼無珠。打個譬喻吖，有品味嘅消費者係會精挑細選然後買一個名牌手袋，只有財大氣粗嘅土豪先至唔理好醜，將一系列名牌貴貨大手購入再胡亂着上身，結果展現嘅唔係品味，而係俗氣。