政情：保安系統冇開 「豪」宅遇竊
早前去新西蘭旅行期間屋企被爆竊嘅「新金王」金至尊集團主席黃英豪（Kennedy），尋日同家人一齊現身馬場。講起爆竊件事嘅時候，Kennedy仲自爆原來屋企本身係有保安措施，不過當晚囝囝黃宇德夜咗返去，所以未嚟得切開啟啲保安措施就已經俾賊人有機可乘喇。好彩最後損失唔算好多，但由依家起佢哋一定會加強保安，仲會開返足啲保安系統咁話。
Kennedy尋日罕有地帶埋囡囡黃宇恆、囝囝黃宇德及太太一齊入馬場為愛駒打氣，事關佢話兩個乖仔乖女分別喺去年十一月同十二月加入咗馬會成為賽馬會會員，目前仲準備緊將兩人嘅名加落佢自己匹「香港至尊」度，等佢地一嘗做馬主滋味，所以以後會多啲帶佢哋入馬場睇睇同感受現場氣氛。
對於近日嘅「驅蝗行動」，Kennedy就話對佢地生意影響唔係好大，不過就表示香港係一個自由開放嘅地方，唔應該用咁嘅態度對遊客，又話如果遊客覺得逼或者唔舒服，佢地都唔會嚟，應該要互相尊重先啱。