民政事務局局長曾德成尋日發表網誌，提到近日備受關注嘅體育賽事，佢冇直接回應本港選手呂品韜喺索契冬季奧運會時有關香港代表團冇隨團隊醫嘅指控，不過就話呢啲係體育界自行決定嘅事務，政府會尊重港協暨奧委會及各個體育總會嘅自主及獨立運作，唔會干預佢地，又形容社會人士關注香港體育發展係可喜嘅情況。
曾德成喺網誌入面，講到好多香港運動員年內接連出征國際賽。雖然佢冇直接提到「速滑小子」呂品韜投訴冇隊醫隨團影響表現嘅事，但就話年輕人初接觸運動項目，係經過好多不斷練習同比試，所以佢地嘅投入、付出同努力都係唔可以低估嘅。
至於籌備同參與賽事工作，佢就話好多時係由民間嘅體育組織負責，政府只係擔當埋配合嘅角色。
而根據《奧林匹克憲章》，政府係唔會干預屬於體育界自行決定嘅事務，例如釐定選運動員嘅準則及出賽名單、出外比賽代表隊名單及各項名額、甚至係禮遇同交通配置等等，講一大輪，總之就將責任推得一乾二淨啦。