政情：林健鋒肚屙投唔到票？
立法會議員雄辯滔滔，講就天下無敵，但往往到投票時刻就見真章，任何牛鬼蛇神都逃唔過投票呢塊照妖鏡。好似前日樓市雙辣招三讀表決時，行政會議成員嘅林健鋒（Jeffrey）唔係投支持、反對或棄權票，而係索性連票都唔投，寧願缺席。平時Jeffrey一定係政府忠實粉絲，今次竟然夠膽唔撐政府，唔通佢背後有一股比政府更強大嘅力量喺度左右佢？
以工商界議員為主嘅經民聯，基本立場係反對政府加推樓市辣招，所以地產及建造界議員石禮謙就投反對票，Jeffrey雖然係經民聯成員，但由於佢身兼行政會議成員，大家嘅合理期望係佢要投票支持政府。就好似上年堆填區撥款一役，就算經民聯劉皇發反對撥款，Jeffrey都要焗住同發叔唱反調，支持政府。
封口拒提缺席事件
正當大家以為Jeffrey會一如以往支持政府，以履行行會成員責任時，點知投票一刻竟然唔見咗佢。好多記者隨即打鑼咁搵佢都搵唔到，直到晚上見佢出席新民黨黨慶時，當然係追住問佢點解缺席啦，平時有問必答嘅Jeffrey都係封口唔提缺席事件，令呢件事更添神秘感。
熟悉Jeffrey嘅政界中人都知道，佢絕對唔係一個夠膽玩嘢搞對抗嘅議員，甚少同政府講數。雖然經民聯打正旗號反對辣招，但Jeffrey作為行會成員，的確大條道理贊成辣招，究竟因咩事搞到佢咁大膽，連票都唔敢投，破壞行會集體負責制呢？我哋尋日打過畀佢幾次，但係都無覆，似乎佢有難言之隱喎。
石禮謙提供「瀉藥」
Jeffrey「失蹤」事件至今仲係一個謎，有另一個版本就話喺投票當日朝早，Jeffrey就同黨友石禮謙去咗食早餐兼密斟。當時Jeffrey胃口大開，除咗食晒自己碗沙嗲牛肉麵同腸仔煎蛋，仲食咗石禮謙半份早餐，結果成個下晝就肚脹脹。最後Jeffrey惟有食幾粒石禮謙提供嘅瀉藥，但隨即好似「山洪暴發」咁不停去廁所，可能因為咁而投唔到票。
照咁睇，呢份「早餐」一定好重分量啦，唔知係咪地產商請佢食嘅呢？不過食兩家茶禮，好容易出事o架，Jeffrey下次記得小心啲。