中環出更：彭太帶病獻唱有小鳳姐風範
過咗年十五，團拜仍陸續有來，前晚輪到女童軍總會新春團拜。一如往年，佢哋喺佐敦總部開露天美食派對，城中名太齊切燒豬。香港總監彭徐美雲帶病上台高歌一曲助興，歌喉沙沙哋，甚有「小鳳姐」徐小鳳風範。
新春期間，名太爭住外遊。為避泰國示威嘅彭太，去咗大阪旅行，幸好未受日本大風雪影響。佢笑言大阪只落微雪，認真係天公造美。候任女童軍總監嘅賭王千金何超鳳都與好友結伴去歐洲滑雪，佢好謙話自己滑雪技巧麻麻，話未有跌斷手腳回來，已經算好彩。
女童軍今年搞世界大會
副會長陳曦齡就與名醫老公及歲半孫兒Augustus遊加拿大，孫兒初嘗滑雪滋味，竟然唔怕凍，仲玩得好投入。但返到香港，陳醫生就無暇湊孫，一有時間跑去深圳睇舖，佢計劃未來一、兩年喺內地開三十間健康食品分店，忙到無時停。
數大忙人，仲有國際事務總監李周美枝（Pearl）。佢預告今年係女童軍超忙碌嘅一年，七月將舉行世界女童軍大會。呢個活動首次在港舉行，屆時將有六百位來自逾百個國家嘅女童軍代表出席，相信會好熱鬧。早前有示威人士反對內地個人遊「強攻」香港，Pearl話相信港人好理智，加上訪港嘅女童軍訓練有素，唔擔心會造成混亂。
身為名譽副會長嘅太子珠寶鐘錶執董鄧宣宏雁都反對趕絕個人遊，佢話最緊要人人有工做，和氣生財，不應搞分化。鄧太又認為個人遊帶旺各行業，佢公司都受惠，聘請咗唔少大學畢業生及基層員工，創造更多就業機會。
卓妮