【本報訊】「色字頭上一把刀，懵盛盛咁上當，畀人呃咗千幾蚊，但好彩最後都懵唔晒，冇再畀錢！」墮入「微信」援交陷阱的陳先生，承認自己「衰鹹濕」，心急與台灣靚女「試一次」，理智被蒙蔽受騙，招致損失。他坦言自己日後交友時必更加謹慎，又提醒男士們：「唔好隨便信靚女！」
做三行的陳受訪時坦言：「我做嘢個環境全部係男人，搵個女仔都難，之前試過返鄉下相睇，但睇嚟睇去都冇個啱……依家年紀大咗，唔單止甩咗幾隻牙，更感到心臟有問題，惟有用咁嘅方法搵女仔啦。」他承認因見對方靚女，才會「畀鬼迷咁樣，盲舂舂約佢見面援交」，並說：「好在最後冇畀佢呃埋嗰萬幾蚊，如果唔係真係慘啦。」經過今次事件，他才真真正正體驗到色字頭上一把刀「係乜嘢」感受，直言：「依家已經醒覺咗，以後一定會帶眼識人。」
另一名同墮陷阱的姓鄧少年則坦言：「邊有咁易搵到援交呀！」又指騙徒：「佢呃一個，就呃得幾百蚊，呃幾十個、幾百個就唔止呢條數！」他又說：「報警都無用，所以我搵傳媒講件事，希望多啲人知道，好多人需要援交，可能會繼續受騙，我講出嚟，係唔想咁多人畀人呃！」