政情：公民講場：「逢」動議就甩轆 港體育冇運行

立法會體育、演藝、文化及出版界議員馬逢國原本喺今個大會上提出「制訂長遠體育政策」嘅議員議案，討論本地體育發展，但由於立法會到尋日仍然未完成樓宇「雙辣招」印花稅條例草案審議工作，所以要將佢嘅議案押後至下月十九日大會上先至可以審議，但到時索契冬季奧運已經完結好耐，咩話題性都冇晒啦！其實佢去年都曾經提出過類似議案，但同樣遭遇「不測」，事關要讓路討論美國中情局前僱員斯諾登來港披露美國政府入侵本港電腦系統事件，難怪佢尋日悶悶不樂話自己唔係咁好彩。