政情：梁鳳儀搵哈佛做「中轉站」
財經事務及庫務局前副局長梁鳳儀（Julia）自年初離任後，外界一直關注佢嘅去向，甚至盛傳佢會重返「娘家」金融管理局。不過，宣布辭職後話要「迎接人生第三次轉型」嘅Julia，尋日終於經政府新聞處宣布，將會接受哈佛大學亞洲中心（Harvard University Asia Center）委任為研究員，並獲歐洲官方貨幣與金融機構論壇（The Official Monetary and Financial Institutions Forum, OMFIF）委任為高級顧問及撰寫一份報告。
離官場 兼職做研究
負責審視問責官員離職後再工作嘅諮詢委員會睇過Julia嘅個案後，認為兩份新工作冇潛在利益衝突，亦唔會引起公眾反感，所以Julia應該可以安心上機喇！
不過，兩份新工嘅總部分別設於美國同英國，唔知Julia點樣分配返工時間呢？據知呢兩份以學術研究為主嘅新工只係兼職形式，並唔係Julia轉型嘅「目的地」，但以佢喺金融界嘅經驗同實力，只要畀時間佢過一過冷河，事業上要再更上一層樓相信只係遲早嘅事。