環境局局長黃錦星前日發表「香港廚餘及園林廢物計劃二○一四至二○二二」報告，搵咗政府問責官員撰寫獻詞。點知好衰唔衰，被人發現財經事務及庫務局局長陳家強搞錯咗啲廚餘數字，將港人每日丟棄約三千六百噸廚餘，寫做三千九百噸，報大咗成三百噸廚餘。陳尋日就大呼冤枉，話段獻詞事前畀環境局睇過晒，對方話冇問題先至出街。今次佢真係被人老點、跣咗鑊。
陳家強喺廚餘報告嘅獻詞入面話，香港呢個繁忙城市，每日產生九千噸都市固體廢物，其中廚餘約佔四成共三千九百噸，相當於二百五十架雙層巴士重量，呼籲大家齊響應減少廚餘。
不過，原來佢講緊嘅係「易腐爛廢物」數據，即係除咗廚餘之外，仲包埋園林廢物及個人護理棉製品，點知環境局睇漏眼。環境局尋日就辯稱，份報告講緊政府將來點樣處理廚餘同園林廢物，陳局長將兩個數據加埋一齊，佢嘅講法冇錯喎！
原來環境局啲數據可以咁彈性處理，唔怪得之前環保署被踢爆用廢塑膠進出口貿易數據泵大香港嘅回收數據，咁樣篤數法，環境局都可以死口唔認啦。