過往被喻為立法會「尚方寶劍」嘅《立法會（權力及特權）條例》（特權法）近年屢被濫用，泛民主派不論事情大小，都會動輒動議引用特權法調查，搞到呢項立法會特權cheap晒。尋日又有泛民議員喺內務委員會上動議引用特權法調查商台解僱節目主持人李慧玲事件，結果喺建制派反對下以大比數否決啦。期間進出口界議員黃定光（象哥）更聲言之前不知李慧玲是誰，認為立法會唔應該動用特權法同嘥公帑調查呢隻「小爬蟲」喎！
大家咪睇小象哥呢個「小爬蟲」比喻，原來係有晒典故嘅，當中最出名係中共開國元老董必武當年數臭林彪時所用，全句係「欺世盜名小爬蟲，以假充真變色龍」，意指一啲壞事做盡，但做唔起頭嘅小角色。民主黨議員何俊仁反斥象哥唔識李慧玲係「低知識」，但唔識一個電台節目主持人又有幾出奇呢？
議員黃國健指出，綜合商台同李慧玲嘅講法，懷疑李純粹係與上級鬥氣而被炒，為免太冇面而扯上新聞自由做烈士，再拉埋特首梁振英落水。佢認為，立法會唔應該介入個別傳媒機構嘅人事調動，否則咁先係干預新聞自由。