中環出更：酒會邀夏千福 民記言行不一？
美國駐港總領事夏千福（Clifford A.Hart）自去年七月底來港上任後，一直高調落區大打親民牌，兼頻頻向香港各界收風談政改嘅作風，早已惹來北京強烈不滿，除咗官媒批評佢對香港事務說三道四，民建聯（民記）成員都叫過佢講少句當幫忙。不過，民記尋日竟然邀請夏千福參加喺該黨總部舉行嘅工商專業新春酒會，民記高層仲同夏千福談笑風生，唔知呢啲係咪叫講一套做一套呢？
被問佔中 唔敢回應
話說民記主席譚耀宗（譚sir）主持祝酒儀式時就叫大家唔好參與佔領中環行動，傾政改應該有商有量。在場嘅夏千福似乎冇乜反應，事後問佢點睇佔中行動，佢就話唔評論，唔知係咪身處民記主場唔敢亂講嘢呢？
儀式完咗，夏千福又即時主動咁行去台前同民記主席譚耀宗（譚sir）打招呼，兩人傾咗幾分鐘，跟住輪到立法會議員蔣麗芸（Ann）上前加入討論。阿Ann用普通話同夏千福講，話聽聞佢啲普通話講得好好，問佢點解會講得咁好？夏千福就用番普通話回答，話「不知道」。其實身為駐港總領事，唔識少少普通話又點收風呢？
卓妮