中環出更：廚餘變花肥 潮太減廢易
潮流興減廢，唔少城中名人都身體力行齊將廚餘變花肥。中華總商會永遠榮譽會長蔡冠深太太蔡關穎琴（Janice）話，早前親自去日本買咗部家用廚餘機返港，試用咗兩個幾月，愈用愈開心。東區區議會前主席丁毓珠旗下學校亦引入廚餘處理系統，最近仲利用廚餘花肥種出好靚嘅番茄同薑添！
國際華商協進會日前舉行講座兼春茗，有份出席嘅特首夫人梁唐青儀都有分享如何喺家中使用廚餘機自製花肥，佢會用廚餘製造出嚟嘅鬆泥，再添加些少肥料自製花肥。
成功種出番茄同薑
同場嘅丁毓珠聽到梁太咁講顯得興致勃勃，急問梁太部廚餘機係咩牌子。珠姐話，其實佢兩年前已經響應梁太嘅校園「齊惜福」號召，喺旗下兩間維多利亞中小學自行處理廚餘，成效好好。校方使用廚餘製造肥料，種出好多好靚嘅番茄和薑。
台北經濟文化辦事處處長嚴重光都有到場，梁太盛讚台灣喺垃圾收費方面行得比香港快，台北嘅家居垃圾仲因此勁減六成以上，佢話港台可以多啲交流，令香港推動垃圾收費時更加順利。
國際華商協進會會長陳趙滿菊（Joise）及副會長羅台秦（Louisa）見講座咁受歡迎，勁開心。Joise話，大家要惜福，尤其係改變飲食態度，珍惜食物。Louisa就話，趁新春期間聯誼之餘亦為環保盡一份心力，好有意義。
Janice喺另一活動亦講起減廚餘話題，佢話晚晚用部廚餘機製花肥後即刻撒落屋企花園，唔止減少製造垃圾，仲慳番買肥料嘅錢，真係一舉兩得。佢話減廢原來咁簡單，建議政府應該帶頭做起。
卓妮